مش كل انسحاب هروب… أحيانًا هو نجاة

بقلم د : امال ابراهيم
استشاري العلاقات الأسرية

توابع الفِراق: ثمن الوعي لما يكون
الوعي ثمنه غالي…مش لأنك خسرت علاقة وبس، لكن لأن بعض الناس لما تحس إنك فُقت، وبنيت حدود، وقررت ما تقبلش الأذى تاني، تلجأ لطرق غير أخلاقية علشان تفضل مسيطرة.تشويه السمعة، التقليل من الشأن، قلب الحقايق، وبناء روايات تخدمهم هما… كل ده أحيانًا بيكون رد فعل على إنك خرجت من الدائرة اللي كانت بتستنزفك.

النقطة شديدة الحساسية:
التعامل مع حملات تشويه السمعة بعد الفراق، وخصوصًا لما الفراق يكون من علاقات قريبة أو عائلية.أوقات كتير، القرار بالابتعاد عن علاقة مؤذية مش بيقف عند الانفصال العاطفي، لكنه بيكشف لك وجه تاني أصعب: هجوم اجتماعي، تشكيك،ومحاولات لتشويه صورتك قدام الناس.وده مؤلم… لكنه مفهوم، وله طرق صحية للتعامل معاه من غير ما يدمّرك.

أهم النقاط اللي لازم تبقى واعي بيها:
1. التجارب مختلفة… والناس أوفياء لرواياتهم لما العلاقة تكون عائلية، الموضوع بيبقى أعقد.كل شخص شايف القصة من زاويته، وبعضهم بيكون منحاز لطرف معين، أو متشبث برواية مريحة نفسيًا ليه حتى لو كانت بعيدة عن الحقيقة.مش كل هجوم عليك سببه أنت، كتير منه سببه دفاعهم عن صورتهم هم، أو عن القصة اللي اختاروا يصدقوها.
2. مش كل حاجة تحت سيطرتك
الرغبة في تبرير موقفك، أو كسب تعاطف الجميع، شعور إنساني… لكن الحقيقة إنك مش هتقدر تتحكم في نظرة كل الناس ليك.

محاولات الإرضاء المستمرة بتستنزفك.
اللي في إيدك فعلًا هو قراراتك، حدودك، وطريقة تعاملاتك مهما الناس كدبت الحقيقة بتظهر …التزامك للصمت وعدم الرد او التبرير ..هي الطريقة الأفضل
3. الفراق خسارة حقيقية… حتى لو كان ضروري الابتعاد عن علاقات مؤذية، خصوصًا لو من الأهل، وجع حقيقي.
ممكن تتأثر لما تشوف تفاعلهم مع بعض، أو لما الذكريات ترجع فجأة.الإحساس بالراحة، والغضب، والحزن، وحتى الذنب… كله طبيعي.الشفا الحقيقي بيبدأ لما تقبل الخسارة، وتسامح نفسك على مشاعرك بدل ما تحاكمها.

4. دايرتك المقربة هي طوق نجاتك
وجود أشخاص يحترموا حدودك، ويصدقوك، ويدعموك من غير شروط، بيعيد ترميم ثقتك في الناس.العلاقات الصحية — سواء قديمة أو جديدة — مش رفاهية، دي ضرورة نفسية.
الانفصال مش نهاية العالم، لكنه أحيانًا بدايته الحقيقية.فرصة إنك تحمي نفسك، وتخرج من دوائر سامة، وتتعلم تفرّق بين اللي تقدر تغيّره واللي لازم تسيبه.
السلام النفسي مش في كسب المعارك،
السلام النفسي في إنك ما تدخلش معارك من الأساس،وتختار راحتك النفسية… حتى لو كان ثمن الوعي غالي.