“صوتك مو سلة غذائية… صوتك مستقبل وطن!”
بقلم / رواد فاضل
بدت الحملات الانتخابية، وبدت وياها تنهال الوعود، وتتنزل صور المرشحين بكل زاوية… وشوي شوي تنعاد نفس المسرحية اللي نعرفها من زمان.
بس المشكلة مو بهالصور، ولا حتى بهالوعود اللي نعرف نهايتها… المشكلة بالتعليقات!
تقرأها تحس إنو الناس تنازلت عن أحلامها الكبيرة، وصارت تقايض صوتها براتب رعاية، أو سلة غذائية، أو حتى هدية بسيطة!
معقولة هذا صار أقصى طموح البعض؟
معقولة الصوت اللي يغير مستقبل وطن، ينشرى بكيلو طماطة و كيلو شكر؟
وين الوعي؟ وين الألم اللي نعيشه يوميا؟
الشارع المحفر، المي الملوث، الكهرباء المقطوعة، البطالة، المدارس التعبانة، المستشفيات اللي تنقّصك بدل ما تعالجك… هاي كلها ناتجة من “أصواتنا” اللي انباعت!
مو عيب تطالب بحقك، بس العيب إنو تبيع حقك بكمية طحين أو تمن (رز) وتخلي فاسد يمثلّك أربع سنين…
المرشح الصادق ما يشتريك، ولا يغازلك بهدية… المرشح الصادق يخليك تحترم نفسك وتفكر باطفالك وبالمستقبل.
ترى التغيير مو حلم… التغيير يبدأ من “صوتك”.
فكر بيه، لا تخليه يضيع!
