التأمل والتجلي
بقلم د. مها العطار | ملكة الطاقة
أشهر كلمتين دلوقتي على السوشيال ميديا: «التأمل» و«التجلّي» وهنا لازم تكون لنا وقفة مهمة جدًا… وقفة للفهم والتحليل، مش لمجرد الرفض أو القبول.
قبل ما تحكموا على أي فكرة جديدة، اسألوا نفسكم الأول: إيه المعنى الحقيقي ورا الاسم؟ وليه بعض المصطلحات بقت منتشرة بالشكل المبالغ فيه ده؟ وهل مجرد موضة، ولا ورا انتشارها تأثير أعمق محتاجين نفهمه؟
دعوني أقولكم حاجة مهمة : لما تسمعوا كلمة التأمل تذكروا قول ربنا سبحانه وتعالى: ﴿وَفِي أَنفُسِكُمْ أَفَلَا تُبْصِرُونَ﴾ ولو كلمة التأمل نفسها مش مريحة ليكم، ببساطة اقعدوا شوية مع نفسكم . تفكّروا في خلق رب العالمين، وتأملوا في نفسكم، وفي اللي بيحصل جواكم، وفي الرسائل اللي ممكن تفهموها من تجارب حياتكم . اذكروا ربنا، وناجوه، وادعوه بكلامكم ومن قلوبكم… مش مجرد ترديد كلمات من غير حضور قلب أو إحساس بمعناها
ولما تسمعوا كلمة «التجلّي» اسألوا نفسكم: إيه الأمنية اللي نفسكم تتحقق؟ ادعوا ربنا يحققها ليكم، لكن في نفس الوقت اسألوا نفسكم سؤال مهم جدًا: إيه السبب اللي أقدر آخد بيه النهارده علشان أقرب من تحقيق أمنيتي؟ ادعوا، واسعوا، واعملوا اللي في إيديكم، وخدوا بالأسباب، وبعدها توكّلوا على الله وده ليس معناه إن كل ما يُقال عن التجلّي صحيح، أو إن مجرد التفكير في الحاجة كفاية علشان تتحقق
وهنا بقى الرسالة الأهم
مش كل مصطلح جديد لازم نرفضه لمجرد إن اسمه غريب علينا، ومش كل فكرة منتشرة لازم نتبعها لمجرد إن الناس كلها بتتكلم عنها افهموا الأول… حلّلوا… وميّزوا بين المعنى الحقيقي والمبالغات اللي بتتقدم حواليه كل حاجة بتبدأ من الطريقة اللي بتبصّوا بيها للأمور
ولما توسعوا نظرتكم، هتعرفوا تاخدوا من كل فكرة اللي ينفعكم ويتفق مع قيمكم وإيمانكم ووعيكم وإمكانياتكم، وتسيبوا اللي ما يناسبكم بهدوء ومن غير صراع وسعوا مدارككم… وافهموا الفكرة قبل ما تحكموا عليها من اسمها لأن الوعي الحقيقي مش إنك تصدّق كل حاجة، ولا إنك ترفض كل حاجة… الوعي الحقيقي إنك تفهم، وتميّز، وتختار عن بصيرة
